Ses jaroj da kritikado, kaj mi iras nenien

Etikedoj

feminismo, GLAT, naskiĝtago, organizado, pasporta servo, renkontiĝoj, virintago

Pli ol du monatoj pasis ekde mi lastfoje skribis… Jes, estintus bone pli frue fini la Pasporta Servo libreton, sed aspektas tiel, ke la internacia virina tago donacas al mi tion. Unue mi devas verki artikolon por Revuo Esperanto pri ĝi, kaj poste mi kompreneble pli detale (kaj kun iom pli da kritiko) rakontos miajn spertojn rilate al tiu ĉi projekto.

Hodiaŭ markas jam la sesan jaron, ke mi skribas mian blogon. Mi iras nenien. Ne mankas renkontiĝoj, aŭ interesaj kunlaboroj pri kiuj indas skribi. Ekzemple mi pensas, ke estas vere amuze kaj brile, ke la telegrama komunumo estas tiom aktiva. Almenaŭ la grupoj en kiuj mi partoprenas havas multe da konversacio. Se vi volas ekzerci la lingvon, tio estas la vojo por vi! Kiom interese estas tiel havi Esperantajn konversaciojn ĉiu tage! La alia afero estas, ke el la Egalecen-grupo aspketas tiel, ke ni kreos la unuan klare feminisman Esperanto-renkontiĝeton. Sed, ŝhhhh, tio estas sekreto. (Vere! Eble mi estos duonmortigita, ke mi skribas pri ĝi nun.) Temas pri semajnfino de maksimume 30 homoj, kiuj laboros pri temoj strikte rilate al feminismo kaj Esperanto. Hieraŭ mi finis la skizadon de la semajnfina programo, kaj ni vidu, ĉu ni vere sukcesos kunorganizi tiun renkontiĝeton. Momente la labornomo estas FEK’. Mi lasas al vi diveni kial…

Malgraŭ tio, ke mi ankaŭ ricevis belegan bukedon de tulipoj, mi ne forgesas, ke pri kio temas Tago de Virinoj. Persone, mi festos sabate kun la marŝado en Amsterdamo, kaj organizos ankaŭ klubon por junaj virinoj tiun tagon. Do, kion mi deziras por la Esperanto-komunumo?

• organizantojn, kiuj emas lerni pri kiel GLAT-igi siajn renkontiĝojn,
• multajn GLAT-anojn envolvi en E-renkontiĝojn, ke ankaŭ la ideoj de GLAT-anoj pli forte aperu en la renkontiĝoj,
• partoprenantojn, kiuj komprenas la profundan signifon de respektema konduto en E-renkontiĝoj (tiom da negativaj perfortaj memoroj subite inundas mian cerbon… mi ne volas tion al la nunaj 18 jaruloj…),
• prilaboritan terminologion pri feminismo, por ke ni povu pli bone diskuti pri ajnaj temoj, kaj kompreni pri kio ni parolas,
• specife feminismajn renkontiĝojn, kiu eblas gikumi rilate al niaj interesoj

Kaj kompreneble estas multe ne E-rilataj deziroj, kiujn mi havas kaj volonte realigos iom post iom.

Feliĉan virintagon al vi! Ek al la laboro!

Feliĉan naskiĝtagon, nia kara Zam’!

Etikedoj

bjalistoko, denaskulo, e-festo, e-klubo, esperantistoj, movado, naskiĝtago, uea, universala kongreso, zam, zamenhof

Naskiĝis la 15-an de decembro en 1859 en Bjalistoko. Hm, kiom mi scias ankoraŭ pri nia granda majstro? Mi ne rememoras nomon de edzino, jes pri la okulkuracado, jaro de morto (Kialo? Ne. Li estis sufiĉe juna laŭ mi.), nomoj de infanoj? Tute ne. Mi memoras, ke li certe (eble?) havis almenaŭ du filinojn sed ĉu pli da infanoj? Vi povas kompreni, ke mi funkcias aliel ĉar mi estas denaskulo. Tiajn aferojn mi ne konsideris, kiam mi komencis paroli Esperanton. Ĉu neŭtrala lingvo? Kion tio signifas? Komenci lerni por ideologiaj kialoj? Jes, certe, sed ne pro miaj, sed pro miaj gepatroj, ili ekhavis la ideon instrui al mi. Ekkoni la historion aŭ iomete pli okazis rilate al eventoj. Ekzemple mi devis deklami poemon dum la E-festo de iu E-klubo, kiam mi estis vere juna. Mi multe deklamis, hungare, Esperante, ne gravis. Mi ne ŝatis. Aliaj ŝatis aŭskulti min. Mi ĉesis post la baza lernejo (feliĉe, kial mi faru ion, kion mi vere ne ŝatas?). Do, kio estas E-festo? Kiom bona okazo estas festi la naskiĝtagon de la majstro, ĉu ne? Nun, ke mi pli aĝas, kaj scias, ke li vere neniam volintus tion, mi devas diri la afero ĝenas min. Li ne volis esti nomata majstro, nek volis ke homoj kiuj parolas Esperanton festu lin. Kaj kio okazis? Tiuj stultaj Espistoj elektas ĝuste tiun tagon por festi. Kelkaj vere fervoraj ankaŭ festas la morton. Kiom bone, ke la Universala Kongreso estas en la somero kaj ĉiam ĉirkaŭ la 26-a de julio por festi la naskiĝtagon de Esperanto, do, se mi bone memoras tiam aperis la unua E-libro aŭ ĝiaj rajtoj aŭ io simile. Mi pensas ke tio estas vere konvena por la UEA ĉiukaze. Fakte, ĉu tio gravas, ke mi ne konas la vivon de Zam’ tiom profunde? La historion de Esperanto tiom pasie? Ĉu mi estas nun malpli bonkvalita partoprenanto de la E-movado? Mi pensas, ke ne nepre. Se mi volas scii pli, mi legas pli. Mi demandas pli mian patrinon. Mi pensas, ke mi uzas sufiĉe multe la lingvon kaj lernas vere multe per la lingvo por ĝojigi la fantomon de Zam’. Tion li volis, ĉu ne?

Feliĉan naskiĝtagon Muzaiko!

Etikedoj

elsendo, esperanto radio, ijf, muzaiko, naskiĝtago

Post longa paŭzo per tiu ĉi mallonga artikolo deziras mi feliĉan naskiĝtagon al Muzaiko! Laŭ la statistikoj la radio estas aŭskultata dum pli ol 30,000 horoj! Nkd! La hodiaŭa programo estos historia elsendo: rakontoj pri Muzaiko kaj ĝia festado dum IJF (Internacia Junulara Festivalo en Italio). Bonan amuziĝon! Ne forgesu, ke vi ankaŭ multe kontribuas per aŭskultado, eble unu tagon vi emos kunhelpi! Sendu viajn bondezirojn kaj kunfestu! Mi deziras daŭran fruktoplenan kaj elstaran kunlaboron por la teamo! Mi amas vin!